1Ti 3 | NdeIBE | STEP | Nansi isitsho esiqotho esithi: Uma umuntu ebeke inhliziyo yakhe ekubeni ngumbonisi ufisa umsebenzi olesithunzi.

1 Timothy 3

Ababonisi labadikoni

1 Nansi isitsho esiqotho esithi: Uma umuntu ebeke inhliziyo yakhe ekubeni ngumbonisi ufisa umsebenzi olesithunzi. 2 Umbonisi akumelanga abe ngosolekayo, abe yindoda yomfazi oyedwa, ezithibayo, elamandla okuzibamba, ehloniphekayo, ephatha kuhle izihambi, engafundisa, 3 engayisiso sidakwa, engeladlakela kodwa emnene, engathandi ingxabano, engathandi mali.

4 Kayibe ngephatha kuhle umuzi wayo ibone ukuba abantwana bayo bayayilalela ngenhlonipho efaneleyo.

5 (Uma umuntu engakwazi ukuphatha umuzi wakhe, angaliphatha njani ibandla likaNkulunkulu na?) 6 Akumelanga kube ngosanda kukholwa, hlezi azikhukhumeze abe ngaphansi kokwahlulelwa kunye loSathane. 7 Njalo kumele abe ngodume ngokuhle kwabangaphandle, ukuze angangeni ehlazweni lasemjibileni kaSathane.

8 Ngokunjalo, abadikoni labo kumele kube ngabantu abahloniphekayo, abaqotho, abanganathi iwayini elinengi, abangadingi inzuzo ngobuqili 9 Kumele babambelele eqinisweni elizikileyo kanye lasekukholweni ngesazela esihlanzekileyo. 10 Kumele baqale bahlolwe; nxa kungekho lutho olubi ngabo, kabasebenze njengabadikoni.

11 Ngokunjalo, labomkabo kumele babe ngabesifazana abahloniphekayo, abanganyeyiyo kodwa abazithibayo labathembekileyo ezintweni zonke.

12 Umdikoni kabe lomfazi oyedwa kuphela njalo ophatha kuhle abantwana bakhe kanye labendlu yakhe. 13 Labo abasebenze kuhle bayazuza isithunzi lesithembiso esikhulu ekukholweni kwabo kuKhristu uJesu.

14 Lanxa ngithemba ukuba ngizakuza kuwe masinyane, ngikulobela iziqondiso lezi ukuze kuthi 15 uma ngiphuzile, ukwazi ukuthi abantu kumele baziphathe njani endlini kaNkulunkulu, elibandla likaNkulunkulu ophilayo, insika lesisekelo seqiniso. 16 Kungekho kuthandabuza imfihlakalo yokwesaba uNkulunkulu inkulu: Wabonakala engumzimba, wafakazelwa nguMoya, wabonwa yizingilosi, watshunyayelwa phakathi kwezizwe, umhlaba wakholwa kuye, wenyukiselwa phezulu ngenkazimulo.